Très belle chanson sur la Saint Pierre de Florennes...
Paroles de M. Lasseaux
Interprétation originale par G. Cavillot
Florennes, 1976

(Sur l'air de "La caissière du Grand Café")

Refrain :
Ah qué bèll' fièss' à Florennes,
Pou saquant' c'es't' ène ranguène,
Mais les P'tits, les Routch's, è co les Blancs,
Tout 'mond' s'amûs', c'est l'impôrtant.
Pas côs in sôdard a s'chique,
Mais gna rin là d'dins d'tragique,
Nos zouzous, nos sapeûrs ou bin nos grenadiers,
C'est leû dicauss' dins l'amitié.

1.
Ah, nous' autes quand arriv' li mwès d'juin,
I faut vèye s'affoufyî tout's nos djins :
C'est qu'bin râte ça va ièss' noss' Saint-Pierre !
È les Florènwès ni voul'nu nin
Aux ouyes di tertous passer pou rin.
C'qu'on nous d'mand' ? Bin sûr qui nous l'fions bin !
Nous v'lons moustré qu'nous astons très fiers
Di noss' bèll' mârch' du bon vî timps.

2.
Li sèmdi nos feum's, di grand matin,
Dins leû maîe ont plondjî leû deûx mwains.
Ell's vont fait in moncia d'bonnès tautes
Aux billoqu's, au suc' è au côrin.
Viè deûx heûres résonn'nt, dins li lointin,
Li fiff', li battrîye è ses roûlmints.
In p'tit vèrr' di goutt' è puis èn' aute,
On est binauje, on s'attind bin.

3.
Mais nous v'là d'dja l'dimègn' au matin !
Les tamboûrs ravèy'nu tout's les djins.
Faut ièss' à mèss' à timps à l'tchapèlle,
Pou nos marcheûs qui n'vèrront pu rin.
Après on èva au monumint,
Su' l'place, pou prind' li r'liqu' è les Saints.
Li djournèye va ièss' sur'mint fôrt bèlle,
Li solia lût dispûs longtimps.

4.
À chij' heûres, dins l'parc, c'est l'grand momint !
D'vant l'château, les amis, les parints,
Dins l'tribun', gna des parlementaires,
Des mayeûrs, Conseillers, des Ech'vins.
On rattind qu'on r'mètt' aux pus anciens
Leûs mèdaîyes, avoû èn' pougnîye d'mwains
I s'rècrèss'nu tertous è i sont fièrs,
Li lârm' à l'ouîye è l'coeûr contint.

5.
Officiers, sôdârds è musiciens,
Les tambours machîs aux instrumints,
Li goutt' aux tonias des cantinières :
C'est lundi, gna pupon d'réglemint !
L'après-midi, partout gna d'l'entrain,
Au faubourg, su l'place è chez l'Dwèyin,
C'es't' ainsi qui s'tèrmin' noss Saint-Pierre,
On r'mèttra ça l'annèye qui vint !

 
 
 
 

 Ièsse tambourî
 



Sur l'air de "Dji sus saulèye" 
Etienne COUGNON
Florennes, Saint-Pierre 1992

Refrain :

Ièsse tambourî, c'es't' in mèstî
Même si on bwèt comme des trôs
Quand on est plin
On roûte, faut bin !
I faut qu'on fasse nosse boulot
Malgrè nosse mwéche rèputation
Dj' vas vos fé ène confèssion
L'djoû qu' dji crèvrè
Dj' pou vos l'djurè
C' s'ra avè mes makès !

1. N's astons d'ène race particulière
Des cins qu' on lomme les tambourîs
On n'a nin toudis d'bonnes manières
È on aime bin d'couru les fiyes
Mais l'pus impôrtant pou nos autes
C'est l'tradition è l'amusmint
C'est d'boire ène goutte, è puis ène aute
È surtout d'ièsse des bons copains

2. Tout ça nos vint d'nosse hèritâdge
Des ancyens qui nos ont appris
Les côps, les mârches è li r'doublâdge
È li fièrté d'ièsse tambourî
C'est vrai qu c'esteut ène famêuse binde
Les Bibi, Thône ou co Guyaux
Mais d'nos djoûs on n'a nin à s'plinde
Eyet nos autes on a l'Mulot !

3. Pa côps nos feumes fèyenut leu tièsse
Quand, au nût, elles vennut nos rkwer
Mais i n'faut nin lès prînde pou des bièsses
È v'là c' qu' elles ont à nos r'procher :
C'est quand on veut ène cantinière
Bin féte, è in bia p'tit mouzon
On lî fét sièrvu sakan vèrres
È puis on lî tchante noss' tchanson

4. L'aut' djoû, dj'rèscontre in camarâde
Qui m'dit : " t' bèlle-mére, quand elle morra
Choûte bin, c'n'est nin des couillonnâdes
Pou t'tambour, rècupère les pias
C'est les mêyeus, tu pou bin m'crwère"
La d'ssus, mi, dji m'mets à compter
Pac'qu'avoû l'mène, qué bonne affaire !
Tout èl' battriye s'ra èquipée !

5. Quand iun d'nos autes voût fé trop l'bièsse
L'adjûdant, ou l'tambour major
Pou l'engueûler sont toudîs prèsses
C'est vrai qu'pa côps, i n'ont nin tôrt
S'i pluns, i nos bottrunt l'derrière
En nos engueûlant d'tos les noms
Mais i n'savnut fé qu'ène affaire
Gueûlè ou tournè in baston

6. C'est pas côps avè les fanfares
Qu'on pou awè des p'tits problèmes
I gna qu'ont des finales bizarres
Su qui qu ça rtché ? Toudis les mêmes !
È dins ces cas-là, dins l'battriye
I nos faut del concentrâtion
Faut bin qu' on rattrape leus biestriyes
C'n'est nins Solbreux qui m'dira non !

7. Pou Sinte Rolende ou pou Sint Pierre
On est fièrs d'slèver les premis
Si on est traitè d'mercenaires
C'est pa des djins qu n'ont rin compris
Pa côps au truviè des villâdges
Nosse instrumint divint bin lourd
A vos't' avis, qui s'reut ène mârche
Sins airs di fiffre è sins tambours ?